काठमाडौं । नेपालमा कोरोना भाइरस संक्रमितको संख्या ४७ पुगेको छ । बिहीबार थप दुई जना थपिएसंगै सङ्क्रमितको सङ्ख्या ४७ पुगेको हो ।
स्वास्थ्य तथा जनसङ्ख्या मन्त्रालयलको नियमित पत्रकार सम्मेलनमा बिहीबार थप दुई व्यक्तिमा कोरोना सङ्क्रमणको पुष्टि भएको मन्त्रालयका प्रवक्ता डा विकास देवकोटाले जानकारी दिए ।
मन्त्रालयका अनुसार उदयपुरकी ५५ वर्षीया महिला र जनकपुरका १४ वर्षीय बालकमा कोरोना सङ्क्रमणको पुष्टि भएको हो ।
त्यसैगरी हालसम्म कोराना भाइरसबाट निको हुनेको सङ्ख्या नौ पुगेको छ । केही दिन अगाडि काठमाडौंको पेप्सीकोलास्थित सनसीटी अपार्टमेन्टमा देखिएको कोरोना सङ्क्रमित दुवै व्यक्ति निको भई बिहीबार डिस्चार्ज भएका छन् । पाटन अस्पतालमा उपचाररत ५८ वर्षीय छोरा र ८१ वर्षीया आमा निको भई घर फर्किएका हुन् । उनीहरु बेलायतबाट चैत ४ गते आई घरमै लुकेका थिए ।