सुनिता बराल, अध्यक्ष, अनेरास्ववियू
सुनिता बराल नेकपा एमाले निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) को अध्यक्षमा चयन भएकी छन् । अघिल्लो शनिवार अनेरास्ववियु केन्द्रीय कमिटीको बैठकले बराललाई अध्यक्षमा चयन गरेको हो । ऐन महरले संगठनको नेतृत्व लिइरहँदा उनी उपाध्यक्ष थिइन् । एमाले विभाजन हुनुपूर्व अनेरास्ववियुको सचिव रहेका सुदेश पराजुलीले पनि अहिले पार्टी विभाजनपश्चात नेकपा (एकीकृत समाजवादी) निकट विद्यार्थी संगठन अनेरास्ववियूको नेतृत्व गरिरहेका छन् । पार्टी विभाजनपश्चात अनेरास्ववियुको संरचना र ऐन महरको बिदाइसँगै संगठन नेतृत्वको जिम्मेवारी पाएकी नवनियुक्त अध्यक्ष सुनिता बरालसँग अनेरास्ववियु र विद्यार्थी राजनीतिका विषयमा केन्द्रित रहेर गरिएको कुराकानीको संपादित अंश ः
अनेरास्ववियुको नेतृत्वमा आउनुभएको छ, आगामी लक्ष्यहरु के के छन् ?
अनेरास्ववियुको निश्चित लक्ष्य र उद्देश्यहरु हामीले पहिले नै निर्धारण गरेका हुन्छौँ । यसैसँग सम्वन्धित भएर हामी अगाडि बढ्ने हो । अहिले पनि हाम्रा उद्देश्यहरु पूर्वनिर्धारित नै छन् । अनेरास्ववियु सबैभन्दा धेरै विद्यार्थीहरुले भरोसा गरेको र रुचाइएको विद्यार्थी संगठन हो । हाम्रो मुख्य कार्यक्षेत्र भनेको शैक्षिक क्षेत्र नै हो । त्यसकारण अब हामीले शैक्षिक क्षेत्रमा विद्यालयदेखि विश्व विद्यालयसम्मका विद्यार्थीहरुलाई सहजतापूर्वक शिक्षा उपलब्ध गराउनका लागि र जीवन उपयोगी र गुणस्तरीय शिक्षा उपलब्ध गराउनका लागि हामीले पहल गर्छौँ ।
त्योसँगै विद्यार्थीहरुलाई संगठित गर्ने कुरा र आफ्ना समस्यालाई समाधान गर्ने कुरामा आफै पहलकदमी गर्नुपर्छ भन्ने कुरा सिकाउनका लागि पनि विद्यार्थी राजनीतिको आवश्यकता अपरिहार्य छ । योसँगै जोडिएको स्ववियु निर्वाचन लामो समयदेखि स्थगित भइरहेको छ । स्ववियु निर्वाचन गर्नुपर्ने दापयत्व हामीसँग छ । सँगै हामीसँग जोडिएका संविधान कार्यान्वयन गराउने विषय, राष्ट्र, राष्ट्रियतासँग जोडिएको विषयमा अडिग रहने हो । आज हामीले हेरिरहेका छौँ, नेपालको भूमि नेपालीहरुसँग रहँदा पनि नेपालीको हो भन्ने अनुभूति गर्न नेपाली जनताले पाइरहेका छैनन् । यस्ता खालका राष्ट्र, राष्ट्रियतासँग जोडिएका विषय सामाजिक रुपमा देखिएका विकृति विसंगतिलाई निर्मुल पार्दै सामाजिक जनजागरणको अभियानलाई हामीले अगाडि बढाउछौँ । र शैक्षिक क्षेत्रलाई समृद्ध बनाउँदै पछिल्लो समयमा कोभिडका कारण अस्तव्यस्त भएको शैक्षिक क्षेत्र व्यवस्थित बनाउँदै गतिशील बनाउनका लागि भूमिका निर्वाह गर्छौँ ।
अनेरास्ववियुको २५ औँ अध्यक्ष बन्नुभएको छ । यो ठाउँसम्म आइपुग्न क–कसको साथ पाउनु भयो ?
सबैभन्दा ठूलो साथ भनेको अनेरास्ववियुका नेता, कार्यकर्ताको नै पाएको छु । त्योसँगै समाजका अगुवा, एमालेका अग्रज नेताहरुको, अभिभावकको साथ पाएको छु । र, महत्वपूर्ण कुरा के हो भने, आज यो ठाउँसम्म आइपुग्न सुरुवाती चरणदेखि सहयोग गर्नुहुने मेरो परिवार लगायत धेरै जनाको भूमिका, साथ, सहयोगले आज यहाँसम्म आइपुगेको छु ।
राजनीतिमा स्थापित हुनलाई चाकडी गर्नुपर्छ भन्छन् । तपाईँले चाहीँ चाकडी गर्नुभयो कि भएन?
मैले चाकडी गरिन । मैले मेरो जिम्मेवारी निर्वाह गरेर यहाँ आएको हो । जिम्मेवारीप्रति जवाफदेही भएर काम गरे र प्राप्त भएको जिम्मेवारीमा निःशर्त काम गरें ।
तर, तपाईँको घर झापा भएको कारण केपी ओलीको आशीर्वाद लाग्यो भन्छन् नि ?
यो विषयमा म धेरै बोल्न चाहन्न । अघिल्लो कार्यकालमा म अनेरास्ववियुको उपाध्यक्ष थिएँ । त्यसकारण म अध्यक्ष भएँ ।
तपाईँ अध्यक्ष भइसकेपछि अनेरास्ववियु कसरी अगाडि बढ्छ ?
अब हामीले विद्यार्थीसँग जोडिएर काम गर्ने हो । अनेरास्ववियुको संस्थागत निर्णयहरुको साथमा अगाडि बढ्छ र सामूहिक रुपमा काम गर्छौँ । सामूहिक रुपमा कार्ययोजना र कार्यान्वयनमा जान्छौँ । र अब हामीले विद्यार्थीको हरेका समस्या समाधान गर्नका लागि अनेरास्ववियु साथमा छ भन्ने कुरा अनुभूति दिलाउने गरी काम गर्छौँ । र, हरेक नेपाली अभिभावकले, नेपाली जनताले हाम्रो सामाजिक समस्यामा, हाम्रा दैनिक सरोकारका समस्यामा चाहीँ कसैले नेतृत्वदायी भूमिका खेल्छ भने त्यो संगठन चाहीँ अनेरास्ववियु छ ।
र, हामीले कुनै अन्यायको अनुभूति गर्नु पर्दैन, अन्याय परिहालेको खण्डमा पनि न्याय दिलाउनको लागि पहलकदमी गर्ने संगठन छ, भन्ने कुराको अनुभूति दिलाउने गरी अनेरास्ववियुको टिमले काम गर्छ ।
पार्टी विभाजनपश्चात अहिले दुईवटा अनेरास्ववियु छ । एउटाको नेतृत्वको सुदेश पराजुलीले गर्नुभएको छ । अर्कोको नेतृत्व तपाईले गर्नुभएको छ । यी दुईमा के फरक छ ? र, आधिकारिक अनेरास्ववियु कुन हो ?
हामी अनेरास्ववियु नेकपा एमालेसँग आबद्ध अनेरास्ववियु हो । अरु विद्यार्थी संगठनहरु धेरै छन् । यो विषयमा धेरै टिप्पणी गर्न चाहँदिन । र, पार्टी विभाजन भएको कुरामा पनि पार्टी विभाजन भएको भन्न चाहन्न । राजनीतिमा एकखाले मूल्य, मान्यता हुन्छन् । दुईचार प्रतिशत मान्छेहरु पार्टीबाट बाहिर हुने कुरालाई विभाजन नै हो भनेर टिप्पणी गर्न त्यति स्वभाविक पनि देख्दिन । र, नेकपा एमालेसँग नजिक भएको र एमालेको भातृ संगठन भएकाले आज मैले नेतृत्व गरेको अनेरास्ववियु आधिकारिक अनेरास्ववियु हो ।
तर, सुदेश पराजुलीले पनिआफूलाई अनेरास्ववियुकै अध्यक्ष भन्नुहुन्छ नि ?
कसले के नाम राख्यो त्यसले सरोकार राख्दैन । नाम मिल्न सक्छ । तर हामीले नागरिकताको प्रतिलिपि बनाउन खोज्दा फोटोकपी गरेर निस्केको नागरिकताले कसैको पनि परिचयको परिपक्वता दिँदैन । पहिचानको नक्कल गर्न खोज्नु उहाँहरुको केटाकेटीपन हो । उहाँहरुको संगठनको संरचनाले नै देखिएको कुरा हो । उहाँहरु अपरिपक्व हुनुहुन्छ । हिजो सुदेशजी हामीसँगै एउटै संगठनमा हुनुहुन्थ्यो । म उपाध्यक्ष हुँदा उहाँ सचिव हुनुहुन्थ्यो । तर यति धेरै अपरिपक्व तरिकाले काम नगरिदिएको भए हुन्थ्यो । हामीले राजनीतिक रुपमा भनी पनि सकेका छौँ । र, हामी कानूनी रुपमा पनि अगाडि बढ्छौँ । नाम मिल्दो राख्दैमा राजनीतिक लक्ष्यमा पुग्ने सोचाइ छ भने उनीहरुको कमजोरी हो । र, हाम्रै नाम राखेर काम गर्ने मानसिकता हो भने त्यो कुरा त्याग्न सुदेशजीहरुलाई अनुरोध गर्दछु । हामी हाम्रो नाममा अरुको परिचय निर्माण गर्न दिदैनौँ । अनेरास्ववियु हाम्रो नाम हो । हाम्रो परिचयहो । त्यसमा सबैभन्दा बढी हामी नै हकदार छौँ ।
विद्यार्थी संगठनहरु अहिले शैक्षिक एजेण्डामा भन्दापनि पार्टीको कार्यकर्ता मात्र भएको देखिन्छ । किन यस्तो भएको ?
हामी विद्यार्थीकै नेता हो । हाम्रो मुख्य सरोकार विद्यार्थीसँग नै हुन्छ । र, नेतृत्व गर्दै आउँदा हामी केही नेतृत्वगर्ने व्यक्तिहरु पार्टीसँग प्रत्यक्ष जोडिएका हुन्छौँ । तर, यस्को अर्थ यो हैन कि अनेरास्ववियुसँग जोडिएको सबै विद्यार्थीहरु एमालेको नेतृत्वमा जोडिएको हुँदैन । त्यस्तो हुँदैन । लाखौँको संख्यामा हाम्रो संगठनमा जोडिनुभएको हुन्छ । तर, त्यो चाहीँ नेतृत्वदायी भूमिका खेल्ने क्रममा उहाँहरु विभिन्न क्षेत्रमा जानुहुन्छ । र, केही संख्यामा मात्र जोडिन्छौँ ।
यो चाहीँहामी सबैलाई थाहा छ । हामी एमालेको भातृसंगठनको रुपमा काम गरिराखेका छौँ । त्यसकारण हामीले राजनीतिक चेतना भएको व्यक्ति म अनेरास्ववियुको अध्यक्ष भइरहँदा सबैभन्दा बढी मेरो सरोकारवाला पक्ष भनेको विद्यार्थी हो । त्यो सँगसँगै म एमालेको राजनीतिमा पनि जोडिन्छु । यो मेरो राजनीतिक पाटो हो । तर कार्यक्षेत्रको हिसाबले हेर्ने हो भने म विद्यार्थीसँग जोडिन्छु । र विद्यार्थीकै समस्याको काम गर्ने हो ।